AQSh sudi Googleʼni onlayn reklama bozorida monopolist deb topdi

Alphabet Inc. tarkibiga kiruvchi Google kompaniyasi onlayn reklama bozorining alohida segmentlarini nazorat qilish imkonini bergan noqonuniy monopoliya yaratgan. Bu haqda AQSh federal sudyasi Leoni Brinkema qarorida so‘z boradi.

Uning so‘zlariga ko‘ra, Googleʼning reklama birjalari va serverlar bozoridagi monopoliyasi Sherman nomli antimonopoliya qonunini buzadi hamda bu holat reklama beruvchilar va iste’molchilarga zarar yetkazmoqda.

Bundan tashqari, kompaniya mahsulotlarni noqonuniy «bog‘lab qo‘yish» amaliyotida ham aybdor deb topilgan, ya’ni bir mahsulotdan foydalanish uchun mahsulotga to‘lov qilish kerak bo‘lgan.

The Wall Street Journal’ning yozishicha, bu qaror AQSh Adliya vazirligi tomonidan Googleʼning ayrim reklama aktivlarini majburiy sotishga olib kelishi mumkin. Kompaniyadagilar esa bu ayblovlarga javoban, ular halol raqobat yuritayotgani va Adliya vazirligining da’volari raqamli reklama bozoriga oid eskirgan tushunchalarga asoslanganini bildirgan.

2024 yil 5 avgust kuni AQShning Kolumbiya okrugi sudi federal sudyasi Amit Mexta Google kompaniyasi onlayn qidiruv tizimi bozoridagi monopoliyasini saqlab qolish uchun noqonuniy faoliyat yuritgani to‘g‘risida qaror chiqargandi. Shundan so‘ng Adliya vazirligi Google’ni bo‘lib yuborish bo‘yicha talab qo‘yish imkoniyatini faol ko‘rib chiqa boshladi. 

Sud qarorida keltirilishicha, Google’ga egalik qiluvchi Alphabet kompaniyasi boshqa texnologik gigantlarga o‘z qidiruv tizimi smartfon va brauzerlarga standart variant sifatida o‘rnatilishi uchun 26 milliard dollar to‘lagan, bu orqali kompaniya raqobatchilarining bozorda muvaffaqiyatga erishishiga imkoniyat qoldirmagan.

Googleʼning reklama texnologiyalari sohasidagi biznesi o‘tgan yili kompaniyaga 31 milliard dollar daromad keltirgan, bu umumiy tushumning qariyb 10 foizini tashkil etadi.