Toshkentdagi Jaloyir ko‘chasi 3 kunga yopiladi

Sergeli tumanidagi Jaloyir ko‘chasi 18-20 aprel kunlari avtomobillar harakati uchun yopiladi. Bu paytda hududda asfaltlash ishlari olib boriladi.

Foto: Sergeli tuman hokimligi

Toshkentning Sergeli tumani hududidan o‘tgan Jaloyir ko‘chasi uch kunga yopiladi. Bu haqda tuman hokimligi matbuot xizmati xabar berdi.

Qayd etilishicha, Jaloyir ko‘chasida asfaltlashtirish ishlari olib boriladi. Shu munosabat bilan 18-20 aprel kunlari avtomobillar harakati vaqtincha cheklanadi.

Vujudga kelishi mumkin bo‘lgan tirbandliklarning oldini olish maqsadida haydovchilarga boshqa aylanma yo‘llardan foydalanish tavsiya etiladi.

Tuman hokimligi fuqarolardan noqulayliklar uchun uzr so‘raydi.

Avvalroq eskirgan issiqlik quvurlari almashtirilishi sabab Yunusobod tumanining Asomov ko‘chasidagi yo‘lning bir yo‘lagi vaqtincha yopilishi to‘g‘risida xabar berilgandi. Shuningdek, Olimpiya shaharchasi hududi atrofida yerosti tunneli qurilishi sabab Yangi O‘zbekiston ko‘chasining bir qismi 1 sentabrga qadar yopilgan.

#Sergeli #Jaloyir ko‘chasi