Xitoyda korrupsiyaga qarshi kurashishga mas’ul amaldor pora olishda ayblanmoqda

Xitoy prokuraturasi mamlakat Kommunistik partiyasi Markaziy qo‘mitasida korrupsiyaga qarshi kurashga mas’ul bo‘lgan Li Ganni hibsga olishga order berdi, deb yozmoqda Xinhua agentligi.

Qayd etilishicha, Li Gan korrupsiyada ayblanmoqda. Tergov davomida aniqlanishicha, Li Xitoy Kommunistik partiyasi Markazqo‘miga mansabdor shaxslarni tanlash va tayinlashda pora olgan, shuningdek, noqonuniy tijorat faoliyati bilan shug‘ullangan.

Bundan tashqari, tergov versiyasiga ko‘ra, u foydali shartnomalar tuzish hamda Markaziy qo‘mitada lavozim taqdim etish evaziga turli kompaniyalar vakillaridan katta miqdorda pul va qimmatbaho buyumlar olib, xizmat mavqeini suiiste’mol qilgan.

Yuqoridagi qonunbuzarliklar uchun Li Gan 7 aprel kuni lavozimdan olingan va Kommunistik partiya a’zoligidan chiqarilgan.

Eslatib o‘tamiz, 2024 yil dekabr oyida Xitoy Kommunistik partiyasi Xux-xoto shahrining iqtisodiy va texnologik rivojlanish zonasi ishchi qo‘mitasi sobiq kotibi Li Jianpin Xitoy Oliy xalq sudi tomonidan tasdiqlangan hukmga ko‘ra qatl etilgandi. Tergov xulosalariga ko‘ra, qariyb 2 milliard dollardan ortiq davlat mablag‘larini o‘zlashtirgan va 800 million dollardan ziyod pora olgan.