AQShda Ukraina uchun F-16 sotib olish va texnik xizmat ko‘rsatish paketi tasdiqlandi

AQSh Davlat departamenti Ukraina hukumatiga F-16 qiruvchi samolyotlari va tegishli jihozlarni 310,5 million dollarga (274,7 million yevro) sotish imkoniyatini tasdiqladi. AQSh Mudofaa vazirligining Mudofaa xavfsizligi bo‘yicha hamkorlik agentligi zarur sertifikatlarni taqdim etdi va AQSh Kongressini xabardor qildi. Bu haqda agentlik 2 may, juma kuni xabar berdi.

To‘plamga havo kemalarini modifikatsiyalash va modernizatsiya qilish xizmatlari, foydalanish va texnik xizmat ko‘rsatish uchun xodimlarni o‘qitish, ehtiyot qismlar, yerustida xizmat ko‘rsatish uskunalari, dasturiy ta’minot, texnik hujjatlar va boshqa tegishli logistika elementlari kiradi.

Taklif etilayotgan sotuv Ukrainaning uchuvchilarni samarali o‘qitish va AQSh bilan o‘zaro hamkorlikni oshirish orqali joriy va kelajakdagi tahdidlarga qarshi turish qobiliyatini oshiradi, deya ma’lum qildi agentlik.

Asosiy pudratchilar orasida Valiant Integrated Services, Top Aces Corporation, Lockheed Martin Aeronautics, Pratt and Whitney, Snap-on Inc., BAE Systems Inc., AAR Corporation va Comsetra LLC kompaniyalari bor.

Ehtimoliy sotuv «mintaqadagi asosiy harbiy muvozanatni o‘zgartirmaydi», deb hisoblaydi AQSh.