Yaponiyada bolalarga g‘alati ismlar qo‘yish taqiqlandi

Yaponiyada yangi tug‘ilgan chaqaloqqa ism tanlash bilan bog‘liq yangi qoidalar kuchga kirdi, deb xabar beradi The Guardian.

Qayd etilishicha, endi ota-onalar farzandlarining ismlarida iyerogliflardan foydalanganda rasmiy talaffuzini ham ko‘rsatishlari kerak bo‘ladi. Ushbu qaror «kirakira» («yarqirab turgan») — ijodiy, o‘ziga xos yoki «hayratlanarli» iyerogliflar birikmasidan foydalanish amaliyotiga barham berishga qaratilgan.

Bu ismlar odatdagi o‘qilishdan farq qiladigan yoki «juda g‘alati» eshitiladigan ismlardir. Ba’zilari tushunishga qiyin yoki hatto «bema’ni» bo‘lishi mumkin. Bolalarga shaharlar yoki voqealar sharafiga ism qo‘yilgan holatlar ham bo‘lgan. Masalan, sobiq olimpiya chempioni Seyko Hasimoto o‘g‘illariga Girishiya («Gretsiya») va Torino deb ism qo‘ygan — ular Olimpiada aynan shu joylarda o‘tkazilgan yillarda tug‘ilgan.

Yaponiya hukumati yangi qoidalar ma’muriy tartib-qoidalarni soddalashtirish va ma’lumotlarni raqamlashtirish uchun zarur ekanini bildirdi. Noodatiy ismlar maktablar, shifoxonalar va boshqa davlat muassasalarida tez-tez muammolarni keltirib chiqaradi.

Masalan, ism murakkab yoki aniq bo‘lmagan iyerogliflar orqali yozilgan bo‘lsa, uni qo‘shimcha ma’lumotlarsiz to‘g‘ri o‘qib bo‘lmaydi. Bu esa hujjatlarda xatoliklarga va o‘z navbatida, bola tengdoshlari orasida kulgiga qolishiga olib keladi.

«Kirakira» ismlardan foydalanuvchi ota-onalar o‘z tanlovini ko‘pincha jamiyatda individuallikni namoyon etish bilan himoya qiladi.