Britaniya O‘zbekistonda organik mahsulotlar laboratoriyalarini ochmoqchi

O‘zbekiston elchixonasi ko‘magida O‘simliklar karantini va himoyasi agentligi mas’ul xodimlari hamda Britaniyaning Soil Association tashkiloti rahbariyati o‘rtasida onlayn uchrashuv tashkil etildi.

Foto: Qishloq xo‘jaligi vazirligi

Unda mazkur tashkilot boshqaruvchi direktori Jyeyms Keshmor va standartlar bo‘yicha direktori Sara Kompson ishtirok etdi.

Muzokaralar chog‘ida hamkorlikning istiqbolli yo‘nalishlari, jumladan mamlakatda va mintaqada organik qishloq xo‘jaligini rivojlantirish bo‘yicha fikr almashildi. Britaniya tashkilotining O‘zbekistonda o‘z laboratoriyalarini ochish masalasi ko‘rib chiqildi.

Ikki tomonlama hamkorlikning ustuvor yo‘nalishlarini belgilab olishga kelishildi. Shuningdek, O‘zbekistonda organik qishloq xo‘jaligi mahsulotlarini yetishtirish va ularni sertifikatlash bo‘yicha joriy holat batafsil tahlil qilindi.

Soil Association 1946 yilda tashkil etilgan. Tashkilot organik qishloq xo‘jaligi mahsulotlari va barqaror oziq-ovqat ishlab chiqarishga ixtisoslashgan. Uning tasarrufidagi Soil Association Certification Limited kompaniyasi Buyuk Britaniyaning eng yirik organik sertifikatlashtirish tashkiloti hisoblanadi.