Misr gepatitga qarshi dori vositalarining navbatdagi partiyasini O‘zbekistonga yubordi

Misr tomoni umumiy qiymati salkam 115 ming dollar bo‘lgan C gepatitiga qarshi «Sofosbuvir-400mg» dori vositasini beg‘araz taqdim etdi.

Foto: dunyo.info

O‘zbekiston elchixonasi va Misr Sog‘liqni saqlash vazirligi o‘rtasida bo‘lib o‘tgan muzokaralar natijasida ushbu mamlakat hukumati tomonidan O‘zbekistonga insonparvarlik yordami sifatida ajratilgan C gepatitiga qarshi dori vositalarining joriy yildagi ikkinchi partiyasi olib kelindi.

Qayd etilishicha, Misr tomoni umumiy qiymati 114 ming 829 AQSh dollari bo‘lgan 28 qutida 7440 dona C gepatitiga qarshi «Sofosbuvir-400mg» dori vositasini beg‘araz taqdim etgan.

7 iyun kuni Uzbekistan Airways aviakompaniyasi Misr hukumati tomonidan insonparvarlik ko‘magi sifatida ajratilgan C gepatitiga qarshi vositalarini Sharm ash-Shayxdan Toshkentga yetkazib bergan.

Ushbu dori vositalari O‘zbekiston Sog‘liqni saqlash vazirligi huzuridagi Virusologiya ilmiy-tekshirish instituti tomonidan bemorlarga taqsimlanadi.

O‘zbekiston elchixonasi ma’lumotiga ko‘ra, 2023-2024 yillarda Misr hukumati tomonidan mamlakatga C gepatitiga qarshi kurashish uchun umumiy vazni 12,4 tonna bo‘lgan «Daklatasvir» va «Sofosbuvir» dori vositalari 27 partiyada insonparvarlik ko‘magi sifatida berilgan.

Mazkur dori vositalarining umumiy qiymati 1,4 million AQSh dollariga teng.

#Misr #gepatit