Qozog‘istonda armiyaga SMS orqali chaqirishga ruxsat beriladi

Qozog‘istonda harbiy xizmatga majbur shaxslar chaqiruv qog‘ozlarini SMS va davlat xizmatlaridagi bildirishnoma orqali oladi. Mamlakat qonunchiligiga bu borada tegishli o‘zgartirishlar kiritilgani to‘g‘risida Senat apparati rahbari Maksim Spotkay ma’lum qildi.

«Harbiy xizmatga chaqirilishi lozim bo‘lgan fuqaro agar u matnli xabarni o‘qimagan bo‘lsa, tegishli tarzda xabardor qilingan deb hisoblanmaydi», — deyiladi qonun matnida. Chaqiruv qog‘ozlarini yuborishning yangi tizimini Spotkay «soddalashtirilgan» deb atadi. Chaqiriluvchilar SMS’dan tashqari mamlakat hukumatining elektron portali orqali ham xabardor qilinadi.

Senat tomonidan ma’qullangan qonunchilikdagi yana bir o‘zgartirish — talabalarning xizmatga chaqiruvini kechiktirishni cheklash. U qozog‘istonlik yoshlarga har bir ta’lim darajasi uchun bir marta beriladi.

Muddatli harbiy xizmatni o‘tagan fuqarolar Qozog‘istonda mamlakatdagi maktab bitiruvchilarining bilimini baholovchi tizim — Yagona milliy testdan o‘tmagan holda OTMga topshirish huquqiga ega bo‘ladi.