Taxtaqoracha dovonida pulli tunnel quriladi

Samarqand va Qashqadaryo viloyatlari orasidagi Taxtaqoracha dovonida pulli tunnel quriladi. Bu haqda transport vaziri Ilhom Mahkamov parlament yig‘ilishida ma’lum qildi.

Uning so‘zlariga ko‘ra, tunnel uzunligi 7 kilometr bo‘ladi va qurilish davlat-xususiy sherikchiligi asosida amalga oshiriladi.

«Tunnel qurishga talabgorlarda texnik-iqtisodiy asoslarini taqdim qilish masalasi qoldi. Avgust oyida uchta talabgordan biri g‘olib deb topiladi va u bilan tunnel qurish ishlari boshlanadi. Mukammal ishlab chiqilayotgan loyihaviy ishlarni bu yil bitkazib, talabgorni aniqlab, u bilan shartnoma tuzamiz», dedi vazir.

Taxtaqorachada tunnel qurish bo‘yicha prezident Shavkat Mirziyoyev 2019 yilda topshiriq bergan edi. 2023 yil iyuldagi yig‘ilishda u loyiha hamon yo‘qligini tanqid qildi. Shu yil oktyabr oyida Qashqadaryo viloyatidagi yig‘ilishda tunnel qurish ishlarini tezlashtirish bo‘yicha topshiriq berdi.