Energiya resurslaridan noqonuniy foydalanish oqibatida yetkazilgan zarar 600 mlrd so‘mdan oshdi

Tabiiy gaz va elektr energiyasidan noqonuniy foydalanish holatlari to‘g‘risida ma’lumot berildi.

Foto: O‘zenergoinspeksiya

2025 yilda 1394 ta iste’molchi tomonidan energiya resurslaridan noqonuniy foydalanish holatlari aniqlandi, deb xabar berdi «O‘zenergoinspeksiya».

Qayd qilinishicha, 118,8 mln metr kub tabiiy gaz (294,8 mlrd so‘m) va 197,1 mln kilovatt·soat elektr energiyasidan (327,5 mlrd so‘m) noqonuniy foydalanish oqibatida davlat manfaatlariga jami 622,4 mlrd so‘m zarar yetkazilgan.

2023-2025 yillarda avtomobillarga gaz to‘ldirish kompressor shoxobchalarida o‘tkazilgan tezkor nazorat tadbirlari natijasida 182 ta holatda 457,8 mln metr kub, ya’ni qiymati 755,2 mlrd so‘mlik tabiiy gazdan noqonuniy foydalanish holatlari aniqlangan. Bu 91 mingdan ortiq xonadonning iste’moliga teng.

Ta’kidlanishicha, qoidabuzar iste’molchilarga nisbatan belgilangan tartibda chora ko‘rish uchun tegishli hujjatlar huquqni muhofaza etuvchi organlarga taqdim qilingan.