Maxsus xizmat: Germaniyada Rossiyaning josuslik urinishlari ko‘paydi

Germaniya harbiy kontrrazvedka xizmati MAD Germaniyada Rossiya razvedka xizmatlari tomonidan josuslik urinishlari va qo‘poruvchilik harakatlarining sezilarli darajada oshganini qayd etdi. Bu haqda MAD rahbari Martina Rozenberg Berlinda dpa agentligiga bergan intervyusida aytib o‘tdi.

«Gap josuslik holatlari va gibrid choralarning keskin ko‘payishi haqida ketmoqda. Yondashuv yanada kengroq va tajovuzkor bo‘lyapti», — deya ta’kidladi Rozenberg. «Ular sovuq urushdan beri ma’lum bo‘lgan usullardan foydalanmoqda va vositalarni kengaytirmoqda».

Bunga Germaniyaning harbiy inshootlari va infratuzilmasida josuslik qilishga urinishlar, ta’minot liniyalarida diversiyalar, dezinformatsiya, kiberhujumlar va elektron urushdan himoyalangan dron parvozlari kiradi.

Aniqlangan holatlar soni bir yil ichida deyarli ikki baravar oshdi, deb yozadi dpa. Unga ko‘ra, Rossiya agentlari uchinchi davlatlar orqali Germaniyaga kirishda davom etmoqda. «Ular o‘zaro munosabatlar yoki ishonch uchun asos yaratishga harakat qilmoqda. Shuningdek, rus millatiga mansub odamlar, etnik nemis repatriantlari yoki Rossiya Federatsiyasi bilan aloqasi bo‘lganlar ham nishonga aylanishi xavfi mavjud», — dedi Rozenberg. Uning so‘zlariga ko‘ra, nemis harbiy xizmatchilari yoki ikki fuqaroligi bo‘lgan shaxslarning Rossiya va ittifoqdosh davlatlarga ta’til uchun safari chog‘ida alohida tahdid paydo bo‘lishi mumkin – u yerda ularga bosim o‘tkazilishi yoki hamkorlik qilishga majburlanishi mumkin.