Махсус хизмат: Германияда Россиянинг жосуслик уринишлари кўпайди

Германия ҳарбий контрразведка хизмати MAD Германияда Россия разведка хизматлари томонидан жосуслик уринишлари ва қўпорувчилик ҳаракатларининг сезиларли даражада ошганини қайд этди. Бу ҳақда MAD раҳбари Мартина Розенберг Берлинда dpa агентлигига берган интервюсида айтиб ўтди.

«Гап жосуслик ҳолатлари ва гибрид чораларнинг кескин кўпайиши ҳақида кетмоқда. Ёндашув янада кенгроқ ва тажовузкор бўляпти», — дея таъкидлади Розенберг. «Улар совуқ урушдан бери маълум бўлган усуллардан фойдаланмоқда ва воситаларни кенгайтирмоқда».

Бунга Германиянинг ҳарбий иншоотлари ва инфратузилмасида жосуслик қилишга уринишлар, таъминот линияларида диверсиялар, дезинформация, киберҳужумлар ва электрон урушдан ҳимояланган дрон парвозлари киради.

Аниқланган ҳолатлар сони бир йил ичида деярли икки баравар ошди, деб ёзади dpa. Унга кўра, Россия агентлари учинчи давлатлар орқали Германияга киришда давом этмоқда. «Улар ўзаро муносабатлар ёки ишонч учун асос яратишга ҳаракат қилмоқда. Шунингдек, рус миллатига мансуб одамлар, этник немис репатриантлари ёки Россия Федерацияси билан алоқаси бўлганлар ҳам нишонга айланиши хавфи мавжуд», — деди Розенберг. Унинг сўзларига кўра, немис ҳарбий хизматчилари ёки икки фуқаролиги бўлган шахсларнинг Россия ва иттифоқдош давлатларга таътил учун сафари чоғида алоҳида таҳдид пайдо бўлиши мумкин – у ерда уларга босим ўтказилиши ёки ҳамкорлик қилишга мажбурланиши мумкин.