Turkiyada migrantlarning noqonuniy bandligiga qarshi choralar kuchaytirildi

Turkiyada 23 iyuldan Mehnat va aholini ijtimoiy muhofaza qilish vazirligi tomonidan Ichki ishlar vazirligi bilan birgalikda ishlab chiqilgan yangi reglament kuchga kirdi. Hujjat migrantlarni ishlash uchun ruxsatnomasiz jalb qilgan ish beruvchilarning javobgarligini kuchaytiradi.

Yangi qoidaga ko‘ra, ish beruvchilar ularni deportatsiya qilish bilan bog‘liq barcha xarajatlarni, jumladan, ta’minot, turar joy, oziq-ovqat, tibbiy xizmat va repatriatsiyani o‘z zimmalariga oladi. Bundan tashqari, agar chet ellik oila a’zolari bilan birga hibsga olinsa, ish beruvchi ularning xarajatlarini ham to‘laydi.

Deportatsiya tezlashtirilgan tartibda amalga oshiriladi. Shu bilan birga, ish beruvchilardan xodimlar va ularning oilalarini deportatsiya markazlarida uch oygacha muddatda saqlash uchun kompensatsiya undiriladi. Sutkalik xarajatlar miqdorini migratsiya boshqarmasi belgilaydi.

Ta’kidlanishicha, ushbu chora yashirin bandlik va ro‘yxatdan o‘tmagan migratsiyaga qarshi qaratilgan.