Rossiya Ta’lim vazirligi migrantlarning farzandlarini pullik o‘qitish g‘oyasiga qarshi chiqdi

Migrantlarning maktablarda bepul o‘qishini taqiqlash Rossiya Federatsiyasi Konstitutsiyasiga ziddir, dedi Ta’lim vazirligining davlat umumta’lim siyosati va maktabgacha ta’limni rivojlantirish departamenti direktori Aleksandr Reut.

U Davlat dumasining migrantlarning farzandlari uchun 1-sinfdan 11-sinfgacha maktabda bepul o‘qishni taqiqlash haqidagi loyihasiga shunday munosabat bildirdi.

«Bunday loyiha Konstitutsiyaga zid. Konstitutsiyaga ko‘ra, Rossiyaning barcha fuqarolariga va chet el fuqarolariga ta’lim olish huquqi berilgan. Bu Rossiya Federatsiyasi hududida bo‘lgan barcha odamlar uchun umumiy huquqdir. Umumiy ta’lim qismida bu bepul, o‘rta maxsus, kasb-hunar ta’limi qismida ham, ammo oliy ta’lim qismida esa tanlov asosida bepul», dedi u.

Avvalroq Davlat dumasi deputatlari migrantlarning farzandlari uchun 1-sinfdan 11-sinfgacha maktabda bepul o‘qishni taqiqlash to‘g‘risidagi qonun loyihasini parlament palatasiga kiritishga tayyorlayotgani ma’lum bo‘lgandi. Bu haqda Davlat Dumasining Mehnat qo‘mitasi raisi Yaroslav Nilov ma’lum qildi:

«Chet elliklarning farzandlari yoshi va sinfidan qat’i nazar, pullik o‘qishi kerak. Ular uchun rus tilini bilish bo‘yicha test sinovlarini topshirishga urinishlar soni uchtagacha bo‘lishi kerak. Ilgari rad etilgan qonun loyihamizga shunday tuzatishlar kiritildi... O‘qituvchilarimizning ham, rus tilini bilmaydigan chet elliklarning ham asabini asraylik - ota-onasini uyda kutsin yoki pullik asosda maxsus dasturlar bo‘yicha o‘qisin».