​​​​​​​Qirg‘izistonda vazir o‘rinbosari va bir necha mansabdor korrupsiyada gumonlanib qo‘lga olindi

Qirg‘iziston suv resurslari, qishloq xo‘jaligi va qayta ishlash sanoati vaziri o‘rinbosari, veterinariya xizmati boshlig‘i va vazirlikning ikkita bo‘limi boshliqlari korrupsion sxema tashkil etishda gumonlanib hibsga olindi. Bu haqda mamlakat milliy xavfsizlik davlat qo‘mitasi xabar qildi.

Iyulda qishloq xo‘jaligi vazirligi mamlakatda go‘sht narxini barqaror saqlab turish uchun qoramol eksportiga kvota joriy etgandi. Xabarda aytilishicha, vazir o‘rinbosari S. N., veterinariya xizmati rahbari U. K. va vazirlikning ikki bo‘limi boshliqlari chorvachilik bilan shug‘ullanmaydigan affillangan shaxslarga kvotalarni noqonuniy berishni yo‘lga qo‘yishgan.

"Vositachilar noqonuniy olingan kvotalarni fermer va qoramol eksporti bilan shug‘ullanuvchilarga sotish bilan shug‘ullanib kelishgan", — deyiladi xabarda.

Xabarga ko‘ra, shu yo‘l bilan O‘zbekistonga Jalolobod viloyati orqali 40 ming boshdan ortiq qoramol noqonuniy tarzda eksport qilingan.

Mazkur harakatlarni sodir etishda gumonlanganlarning barchasi hibsga olingan.