Ichida sichqonlar va pashshalar bo‘lgan sun’iy yo‘ldosh orbitaga uchirildi

Ichida 75ta sichqon va 1,5 mingta pashsha bo‘lgan "Bion-M" sun’iy yo‘ldoshi "Soyuz-2.1b" raketasi yordamida orbitaga olib chiqildi.

Xabar qilinishicha, sun’iy yo‘ldosh orbitaga 9 daqiqa 23 soniyada yetkazilgan.

Olimlar "Bion-M" №2 sun’iy yo‘ldoshiga joylashtirilgan sichqon va pashshalar orqali kosmik radiatsiya va geomagnit maydonining tirik organizmlarga ta’sirini o‘rganishadi.

Sun’iy yo‘ldosh orbitada 30 sutka bo‘lishi rejalashtirilgan.

"Bion-M" №2 germetik qurilma bo‘lib, ichi va tashqi qismida ilmiy qurilmalar joylashgan. Uning ichiga sichqonlar va pashshalardan tashqari, dorivor o‘simliklar, urug‘lar, suvo‘tlar, mikroorganizmlar, inson va hayvonlarning ildiz hujayralari ham joylashtirilgan.

1973 yildan 1996 yilgacha kosmosga 11ta "Bion" uchirilgan bo‘lib, ularning bortida maymunlar, sichqonlar, kaltakesaklar, guppi baliqlari, hasharotlar va bir hujayrali organizmlar bo‘lgan.