Ijro ishi bo‘yicha kafolat mablag‘lari instituti joriy etiladi

«Sud hujjatlari va boshqa organlar hujjatlarini ijro etish to‘g‘risida»gi qonunga yangi mexanizm kiritilmoqda – ijro ishi bo‘yicha kafolat mablag‘lari.

Maqsad – ijro hujjatlari ustidan shikoyat qilishda qarzdorlar va undiruvchilarning manfaatlarini muvozanatlash.

Qonun O‘zbekistonda ijro ishi bo‘yicha kafolat mablag‘lari institutini joriy etuvchi normalar bilan to‘ldirildi (qonunning 11-, 33-1-, 34- va 38-moddalari).

Agar qarzdorga nisbatan ijro ishi boshlangan bo‘lsa (sud qarori bo‘yicha mol-mulkni undirish), u shikoyat qilish davrida ijroni to‘xtatib turish imkoniyatiga ega. Buning uchun qarzdor majburiy ijro organining maxsus depozit hisobvarag‘iga pul mablag‘larini – ijro ishi bo‘yicha kafolat mablag‘lari deb ataluvchi mablag‘larni kiritishi mumkin.

Kafolat mablag‘larini ijro hujjati bo‘yicha majburiyatlarning to‘liq hajmida yoki bajarilmagan qismi miqdorida kiritish kerak.