Polsha o‘z fuqarolariga Belarusni tark etishni tavsiya qildi

Polsha Tashqi ishlar vazirligi Polsha fuqarolariga Belarusni tark etishni va bu davlatga sayohat qilishdan bosh tortishni tavsiya qildi. «Bu demokratik davlat emas va u Polshaga do‘stona munosabatda emas. Men bu ogohlantirishlarga imkon qadar jiddiy munosabatda bo‘lishini istardim», — deya RMF24 internet nashri Polsha TIV matbuot kotibi Pavel Vronskining bayonotini keltirgan.

Avvalroq, 4 sentabr kuni Belarus televideniyesi Belarusda 1998 yilda tug‘ilgan Polsha fuqarosining josuslikda ayblanib hibsga olingani haqidagi reportajni namoyish qilgandi. Erkak 12-16 sentabr kunlari o‘tkazilishi rejalashtirilgan «Zapad-2025» Rossiya-Belarus harbiy mashg‘ulotlari haqida ma’lumot yig‘gani da’vo qilingan.

Xabarda aytilishicha, Krakovda istiqomat qiluvchi shaxs ijtimoiy tarmoqlar orqali Belarus fuqarosi bilan aloqa o‘rnatgan va unga Polsha maxsus xizmatlari bilan hamkorlik qilishni taklif etgan. Boshqa narsalar qatorida, gap Belarusdagi harbiy obektlar to‘g‘risidagi ma’lumotlarning uzatilishi haqida borgan.