Tramp YeIga Hindiston va Xitoyga 100 foizgacha bojlar kiritishni taklif qildi

AFP agentligining muzokaralardan xabardor bo‘lgan amerikalik mulozimga tayanib yozishicha, Yevropa Ittifoqi ham xuddi shunday choralar ko‘rsa, Qo‘shma Shtatlar Rossiya neftini sotib oluvchi mamlakatlarga bojlarni kengaytirishga tayyorligini ma’lum qildi.

AQSh va Yevropa Ittifoqi muzokaralariga qo‘shilgan prezident Donald Tramp Rossiya nefti xaridorlari, jumladan, Xitoy va Hindiston uchun 50 foizdan 100 foizgacha boj kiritishni taklif qildi. «Rossiya urush mashinasi uchun pul manbayi Xitoy va Hindistonning neft sotib olishidir. Agar siz bu manbani kesmasangiz, urush mashinasini to‘xtata olmaysiz», deb ta’kidladi rasmiy. Muhokamada AQSh moliya vaziri Skott Bessent, savdo vakolatxonasi va Davlat departamenti vakillari ishtirok etdi.

AQSh rasmiysining so‘zlariga ko‘ra, Tramp «harakat qilishga tayyor», biroq Yevropa Ittifoqi Vashington bilan birgalikda harakat qilishi zarur, deb hisoblaydi. Ikkinchi manba 85 senator tomonidan qo‘llab-quvvatlangan qonun loyihasini eslatib o‘tdi, u prezidentga Rossiya bilan savdo qiluvchi mamlakatlarga ikkilamchi tariflar joriy etish imkonini beradi. Biroq, uning qo‘shimcha qilishicha, Yevroparlamentda bunday qadamni qo‘llab-quvvatlash uchun «siyosiy iroda» bor yoki yo‘qligi savol ostida qolmoqda.