Andijondagi sement zavodi faoliyati vaqtincha to‘xtatildi

Zavod faoliyati ijtimoiy tarmoqlardagi shikoyatdan so‘ng to‘xtatilgani ta’kidlanmoqda.

Foto: Ekologiya vazirligi

Andijon viloyati, Xo‘jaobod tumani, «Imom ota» mahallasida joylashgan Recosement zavodi faoliyati vaqtincha to‘xtatildi, deb xabar berdi viloyat Ekologiya boshqarmasi.

Qayd qilinishicha, 13 sentabr kuni ijtimoiy tarmoqlarda zavodning havoni ifloslantirayotgani haqidagi videomurojaat tarqalgan. Shunga asosan Ekologiya boshqarmasi xodimlari o‘rganish o‘tkazgan.

O‘rganish davomida hududdagi havoning sifati Ekolab uskunasi yordamida laboratoriya tahlilidan o‘tkazilgan. Uning natijalari xabarda keltirilmagan.

Ta’kidlanishicha, zavod faoliyati «sohaga oid kamchiliklar bartaraf qilingunga qadar» vaqtincha to‘xtatilgan.