Afg‘onistonda internet yana ishga tushdi

Avvalroq mamlakatda internet butunlay o‘chib qolgan edi. «Tolibon» vakili buni optik tolali tarmoqlar ta’mirlanayotgani bilan izohladi.

Foto: Getty images

Afg‘onistonda internet to‘liq tiklandi, deb xabar berdi Tolo News.

29 sentabr kuni dunyoda internet erkinligi monitoringi bilan shug‘ullanuvchi NetBlocks tashkiloti optik tolali internetni o‘chirish bilan «Tolibon» mamlakatda «ma’naviyatni ta’minlash choralarini» amalga oshirishni boshlaganini ta’kidladi.

30 sentabr kuni Afg‘onistonda hukmronlik qilayotgan «Tolibon» harakati bu da’volarni rad qilib, mamlakatda internetning o‘chirilishi «optik tolali infratuzilmaning buzilishi» bilan bog‘liqligini ma’lum qildi.

Associated Press xabariga ko‘ra, bu mamlakatda internetning o‘chirilishi, bu esa bank, savdo va aviatsiyada uzilishlarga olib kelgani haqidagi birinchi ommaviy bayonotdir.

«Tolibon» vakili Zabihullo Mujohid so‘zlariga ko‘ra, hozir optik tolali tarmoqlar almashtirilmoqda. «Tolibon» butun mamlakat bo‘ylab internetga kirishni taqiqlagani haqidagi ma’lumotni harakat vakili «mish-mishlar» deb atadi.