Moskvada minglab reyd natijasida 450 nafardan ortiq migrant deportatsiya qilindi

Moskvaning jamoat joylari, savdo va oziq-ovqat markazlari, yotoqxonalar va boshqa nuqtalarida o‘tkazilgan 7632 ta reyd natijasida 1400 nafarga yaqin migrantni chiqarib yuborish to‘g‘risida qarorlar qabul qilindi, ularning 450 nafardan ortig‘i Rossiyadan deportatsiya qilindi. Bu haqda Rossiya Ichki ishlar vazirligining Moskva bo‘yicha bosh boshqarmasi joriy yil 9 oyi yakunlari bo‘yicha ma’lum qildi.

«Migratsiya sohasida 58 mingdan ortiq huquqbuzarliklar aniqlandi, ulardan aksariyati - 15 mingta holat - chet el fuqarosi yoki fuqaroligi bo‘lmagan shaxs tomonidan Rossiyaga kirish yoki Rossiyada bo‘lish (yashash) qoidalarini buzish bilan bog‘liq», deyiladi xabarda.

Shuningdek, 5 mingdan ortiq mahalliy ish beruvchi chet el fuqarolari va fuqaroligi bo‘lmagan shaxslarni mehnat faoliyatiga jalb qilish qoidalarini buzgan.

Shuningdek, turli jinoyatlar, jumladan, og‘ir jinoyatlarni sodir etgani uchun qidiruvda bo‘lgan 242 nafar, xavfli kasalliklarga chalingan 430 nafar, Rossiya hududiga soxta hujjatlar bilan kirgan 100 nafar shaxs aniqlangan.

Avvalroq, 22 sentabr kuni Rosgvardiya xodimlari Krasnoyarskda o‘zbekistonlik xonandaning konsertiga bostirib kirib, Markaziy Osiyo davlatlaridan kelgan 26 nafar fuqaroni qo‘lga olgan edi.