Rossiya va Euroclear o‘rtasidagi nizo Belgiya sudigacha yetib bordi

Reuters agentligining xabar berishicha, Bryusselda joylashgan Euroclear depozitariysi Rossiya Markaziy bankiga qarshi Belgiya fuqarolik sudida da’vo arizasi kiritgan. Kompaniya shu orqali Rossiya Arbitraj sudining Euroclear zimmasiga taxminan 220 milliard yevro (18,17 trillion rubl) miqdorida tovon to‘lash yuklangan qarorini ijro etilishining oldini olishni maqsad qilgan.

Euroclear vakili Yorgen Myulartning Reutersʼga ma’lum qilishicha, kompaniya Rossiyaning emas, balki Yevropa Ittifoqi sanksiyalari talablariga muvofiq harakat qilgan.

«Biz Rossiya sudlari Euroclear faoliyati bo‘yicha yurisdiksiyaga ega emas, deb hisoblaymiz. Biz uchun faqat Belgiya sudlarining yurisdiksiyasi ahamiyatga ega», — degan u.

Joriy yil may oyida Moskva Arbitraj sudi Euroclearʼni Rossiya Markaziy bankiga aktivlar muzlatilishi oqibatida yetkazilgan zarar uchun 18,17 trillion rubl kompensatsiya to‘lashga majbur qilgan edi.

Belgiyaning LʼEcho nashri ma’lumotlariga ko‘ra, mazkur ish bo‘yicha Bryussel korporativ ishlar sudida dastlabki eshituvlar 25 iyun kuni bo‘lib o‘tgan.

Rossiya aktivlari muzlatilgan

Euroclear depozitariysida Ukrainaga qarshi urush boshlanganidan keyin Yevropa Ittifoqi tomonidan muzlatilgan Rossiyaning suveren aktivlarining asosiy qismi saqlanmoqda. Gap taxminan 190 milliard yevro haqida ketmoqda. Bu esa Yevropa mamlakatlarida muzlatilgan jami 260 milliard yevrolik Rossiya davlat aktivlarining katta qismini tashkil etadi.

2025 yil dekabr oyida Yevropa Ittifoqi ushbu mablag‘larning muzlatilishini urush yakunlangunga qadar muddatsiz davom ettirish to‘g‘risida qaror qabul qildi. Ilgari mazkur cheklovlar ma’lum muddatlarga uzaytirib kelinar edi.

Shuningdek, 2024 yildan buyon Euroclear muzlatilgan Rossiya aktivlarini boshqarishdan olinayotgan daromadlarni Ukrainaga ko‘rsatilayotgan moliyaviy yordamni qo‘llab-quvvatlashga yo‘naltirib kelmoqda.