O‘zbekistonda ilk bor «Halol» xalqaro akkreditatsiyasiga ega sertifikatlashtirish organi tashkil etildi

«O‘zbekiston ilmiy-sinov va sifat nazorati markazi» davlat muassasasi (UzTest) huzuridagi «Halol sertifikatlashtirish idorasi» Turkiya Halol Akkreditatsiya Idorasi (HAA) tomonidan akkreditatsiyadan o‘tkazildi.

«Halol sertifikatlashtirish idorasi» «Conformity Assessment: Requiremens for Bodies Providing Halal Certification» xalqaro standartiga muvofiq akkreditatsiyadan o‘tdi. Ta’kidlanishicha, bu O‘zbekistonda «halol standartlari» bo‘yicha faoliyat yuritayotgan tashkilotlar uchun yangi bosqichni anglatadi.

Qayd qilinishicha, hozirgi vaqtda jahon bozorida «halol» standartlari va sertifikatlariga bo‘lgan talab ortib bormoqda. Xususan, mahsulotlarni eksport qilish jarayonida har bir mahsulot turiga mos sertifikatlar talab qilinadi, ular orasida «Halol sertifikati» ham muhim o‘rin tutadi. Bu sertifikat xorijiy, ayniqsa, Islom mamlakatlarining standartlar va metrologiya institutiga (SMIIC) a’zo davlatlarga mahsulot eksport qilishda texnik to‘siqlarni bartaraf etishga xizmat qiladi.

Xalqaro ekspertlar ma’lumotlariga ko‘ra, «halol» sohasi jahon iqtisodiyotida eng tez rivojlanayotgan yo‘nalishlardan biriga aylandi. Hozirgi kunda «halol» oziq-ovqat va ichimliklar sanoati hajmi 2 trillion AQSh dollari, ziyorat turizmi 400 milliard dollarni tashkil etmoqda.