“Shovqin va changdan zada bo‘ldik” – portlatish ishlari turizm qishlog‘iga tinchlik bermayapti

Andijon viloyati Xo‘jaobod tumani Imom ota turizm qishlog‘ida sement ishlab chiqaruvchi xorijiy korxona tog‘larni portlatish yo‘li bilan xomashyo olishi aholining tinchini buzmoqda. “Tunda ham tinchlik yo‘q. Ekskavator tog‘ga tiqib tosh yoradi. Turizm qishlog‘i changga, shovqinga to‘lgan. Odamlar bu shovqindan bezib ketdi”, deydi qishloq odamlaridan biri.

Kun.uz'ga murojaat yo‘llagan vatandoshlar turizm qishlog‘ining faqat nomigina qolganini aytishdi.

“Imom otaga turizm qishlog‘i maqomi berilgan. Hokimiyat tomonidan tadbirkorlar jalb etilib kreditlar ajratilmoqda, turizmni rivojlantirish maqsadida tadbirkorlar qishloqqa mablag‘ kiritishyapti. Lekin...

Qishloq atrofi tog‘lar bilan o‘ralgan, hozirda 3 ta sement zavodi faoliyat yurityapti. Zavodlar sekin-asta tog‘larni portlatib, tabiiy landshaftga va havo sifatiga jiddiy zarar yetkazmoqda. Portlatish ishlari qishloq aholisi va sayyohlar salomatligini ham xavf ostiga qo‘ymoqda”, – deyiladi murojaatda.

“Ekologiyaning tishi o‘tmayapti”

“Imom ota turizm qishlog‘ining har ikki tomoni tog‘lar bilan o‘ralgani uchun sement zavodi qurib tashlashdi. Xomashyo uchun hammayoqni portlatib, changitib yotishibdi. Bir tomonda turizmni rivojlantiramiz deb tadbirkorlarni jalb qilishyapti, bir tomonda esa tog‘ni portlatib changitishyapti.

Ekologiya degan tashkilotning holatga tishi o‘tmayapti. Butun boshli tog‘ yo‘q bo‘lib ketyapti. Bo‘layotgan ishlarga kimdir e’tibor qaratishi kerak emasmi? Ekologiyaga, tabiatga juda katta zarar yetyapti-ku!” – deydi boshqa bir murojaatchi.

Tunlari ham uyqu yo‘q...

“Tog‘dagi portlatish ishlaridan aholi aziyat chekyapti. Ayniqsa, yosh bolalar va yoshi katta insonlarga qiyin bo‘lyapti. Ishlab chiqarish ekan, buni tushunsa bo‘ladi, lekin eng avvalo inson qadri birinchi o‘rinda turmaydimi?

Bunday portlatish ishlari har haftada, ba’zan haftada 2–3 marta bo‘ladi. Hatto kechasi ham ekskavator tog‘ga chiqib olib, taqqillatib tosh yoradi – kechasi ham tinchlik yo‘q.

Surishtirsak, sement ishlab chiqaruvchi korxona xitoyliklarga tegishli ekan. Holatga hokimiyat ham, ekologiya ham panja ortidan qarayapti. Portlashlardan faqat aholi aziyat chekyapti xolos”, – deydi murojaatchilardan biri.

Tsement ishlab chiqaruvchi xorijiy korxona bosh direktori Li Siao Jun (Li Xiao Jun) tomonidan imzolangan xujjatdan turizm qishlog‘ida portlatish ishlari “Andijan WCC Cement” MChJ tomonidan amalga oshirilayotgani anglashiladi.

12 iyun kuni Xo‘jaobodga qo‘shni Buloqboshi tumani hokimligi bayonot berib, Andijon WCC sement zavodida portlatish jarayonida yuzaga kelayotgan holatlar nazoratga olinganini ma’lum qildi.

Hokimlik xabariga ko‘ra, Andijon viloyati Ekologiya boshqarmasi va Buloqboshi tumani hokimligi tomonidan o‘rganish ishlari olib borilmoqda. O‘rganish natijalari yuzasidan qo‘shimcha ma’lumot taqdim etiladi, deyiladi rasmiy xabarda.