Dorixonalarning GPP sertifikati muammosi yuzasidan Farmagentlikka senator so‘rovi yuborildi

So‘rovda sertifikat berishdagi to‘lov miqdori qanday shakllantirilgani, undirilgan yig‘imlar qayerga sarflanayotgani yuzasidan tushuntirish berish so‘ralgan.

Shuningdek, senator GPP sertifikati uchun majburiy to‘lov undirish buyrug‘i bekor qilinsa, kelgusida qanday choralar ko‘rilishi va GPP sertifikatini olgan tadbirkorlardan undirilgan to‘lovlar taqdiri nima bo‘lishiga ham aniqlik kiritishni so‘ragan.

Avvalroq xabar berilganidek, masala Kun.uz'da yoritilishi ortidan, Adliya vazirligi Farmagentlik direktorining GPP sertifikatini berishdagi to‘lovlarni tasdiqlash haqidagi qarorini bekor qilish yuzasidan agentlikka taqdimnoma kiritgan edi. Chunki hujjat adliya organi tomonidan davlat ro‘yxatidan o‘tkazilmagani aniqlangan.

Muammo nimada?

O‘zbekistonda 2025 yil 1 yanvarga qadar farmatsevtika mahsulotlarini chakana sotish bilan shug‘ullanuvchi tarmoqli dorixonalar, 2026 yil 1 yanvarga qadar esa boshqa dorixonalar “Zarur dorixona amaliyoti” (GPP) sertifikatini olishi zarur. Aks holda, ularning faoliyat yuritishiga yo‘l qo‘yilmaydi.

Sertifikat Farmatsevtika tarmog‘ini rivojlantirish agentligi huzuridagi “Zarur amaliyotlar markazi” DUK tomonidan beriladi. Bunda markaz xodimlari dorixonalar faoliyatini joyiga chiqib tekshiradi, belgilangan talablarga javob bergan dorixonalarga 3 yil muddatga sertifikat beriladi.

Amaliyotda dorixonalar ushbu sertifikatni olish uchun 8,5 mln so‘mgacha majburiy to‘lov to‘lashga majbur bo‘lmoqda. Har 9 oyda o‘tkaziladigan navbatdagi inspeksiya tekshiruvi uchun esa qo‘shimcha 3,2 mln so‘m to‘lov undirilmoqda.

Senat press-relizida qayd etilganidek, to‘lov miqdorining yuqoriligi jamoatchilik va tadbirkorlar orasida katta norozilikka sabab bo‘lmoqda. Jumladan, ko‘plab dorixona egalari buni qonun bilan belgilanmagan majburiy yig‘im sifatida baholamoqda.

Bundan tashqari, o‘tkazilayotgan tekshiruvlarda qo‘yilayotgan talablar litsenziya talablari bilan deyarli bir xil bo‘lib, ortiqcha byurokratik yuk va takrorlanuvchi nazorat choralarini keltirib chiqarmoqda.

Shuningdek, tadbirkorlar dorixonalarda sanitariya va gigiyena talablarini ta’minlash bo‘yicha ortiqcha qog‘ozbozlik ko‘payganidan, xona haroratini aniqlovchi termometr uskunalarini har yili qiyoslovdan o‘tkazish bo‘yicha ham qo‘shimcha to‘lovlar talab etilayotganidan o‘z noroziligini bildirmoqda.