«Ko‘pchilik odam qashshoqlashadi»: sun’iy intellekt «otasi» ommaviy ishsizlik haqida ogohlantirdi

«Sun’iy intellekt otasi» deb ataladigan olim va fizik Jyeffri Hinton so‘zlariga ko‘ra, sun’iy intellekt texnologiyalari mehnat bozorini tubdan o‘zgartirishi mumkin va buning oqibatlari unchalik yaxshi bo‘lmaydi.

«Ba’zi odamlar ancha boyib ketadi, ko‘pchilik esa qashshoqlashadi. Bu sun’iy intellektning aybi emas, kapitalistik tizim shunday tuzilgan», dedi Hinton.

Yirik korporatsiyalar tomonidan sun’iy intellektdan foydalanish ommaviy ishsizlikka va shu bilan birga foydaning ulkan o‘sishiga olib keladi. Uning so‘zlariga ko‘ra, ayniqsa, to‘liq avtomatlashtirish xavfi ostida bo‘lgan ofis va ma’muriy kasblar zaif.

Texnologik yetakchilarning «sun’iy intellekt qancha ish o‘rnini yo‘q qilsa, shuncha ish o‘rni yaratadi» deb ishontirishlariga qaramay, so‘nggi ma’lumotlar xavotirli ko‘rinadi. Xalqaro mehnat tashkiloti ma’lumotlariga ko‘ra, aynan kanselyariya lavozimlari generativ sun’iy intellekt oldida eng zaif hisoblanadi va hisob-kitoblarga ko‘ra, 2040 yilga borib AQShdagi ish o‘rinlarining 25 foizi yo‘q bo‘lib ketishi mumkin.

Shu bilan birga, Hinton OpenAI kompaniyasidan Sem Altman kabi ko‘plab sun’iy intellekt yaratuvchilari faol targ‘ib qilayotgan universal asosiy daromad (UBI) g‘oyasini rad etdi. Olimning fikricha, UBI asosiy muammoni hal qilmaydi: ishsiz qolgan odamlar insoniy qadr-qimmat tuyg‘usini yo‘qotadi.

Sun’iy intellekt otasi yaqin 5-20 yil ichida superintellekt paydo bo‘lishi mumkinligini ta’kidlamoqda. Bu voqea tarixda burilish yasaydi: u insoniyatga ulkan foyda keltirishi yoki halokatli oqibatlarga olib kelishi mumkin.