Hafta davomida ayrim hududlarda yomg‘ir, tog‘larda qor yog‘ishi kutilmoqda

Ish haftasi oxirigacha O‘zbekiston bo‘yicha asosan iliq va quruq ob-havo bo‘lishi kutilmoqda. Faqat 29 oktyabrda ayrim tog‘li hududlarda yomg‘ir yog‘adi, baland tog‘li hududlarda qorga aylanishi mumkin, deb xabar berdi O‘zgidromet.

Dushanba kuni havo biroz bulutli, ba’zi joylarda o‘zgaruvchan bo‘ladi, rsepublika hududining katta qismida yog‘ingarchilik kutilmaydi.

Faqat Qoraqalpog‘iston Respublikasi, Xorazm viloyati bo‘yicha sovuq front o‘tishi hisobiga kechga tomon ba’zi joylarda yomg‘ir yog‘ishi mumkin. Kunduzi havo harorati +23…+28 darajagacha isiydi, shimolda +19…+24 daraja bo‘ladi.

28 oktyabrda sovuq front respublikaning barcha hududlari bo‘yicha o‘tadi, ba’zi joylarda kuchsiz yomg‘ir yog‘adi, tog‘oldi va tog‘li hududlarda esa yomg‘ir yog‘adi. Respublikaning baland tog‘li hududlarida yomg‘ir qorga aylanishi mumkin. Havo harorati pasayadi va +20…+23 daraja atrofida bo‘ladi.

Sharqiy shamol yo‘nalishini o‘zgartirib, g‘arbdan 7–12 metr/soniya tezlikda esadi, 27 oktyabrda shimolda va cho‘l hududlarda, 28 oktyabrda respublika bo‘yicha ba’zi joylarda 13–18 metr/soniyagacha kuchayishi, ayrim joylarda chang-to‘zonlar bilan kuzatilishi mumkin.

Harorat kechalari +8...+13 daraja, kunduz kunlari +21…+26 daraja atrofida bo‘ladi, bu o‘rtacha iqlim me’yoridan 3–5 darajaga yuqoridir.

Toshkent shahrida dushanba kuni kunduzi havo biroz bulutli, vaqti-vaqti bilan o‘zgaruvchan bo‘ladi, yog‘ingarchilik kutilmaydi. Shamol sharqdan 3–8 metr/soniya tezlikda esadi. Harorat +23…+25 darajani tashkil etadi.

28 oktyabrda havo o‘zgaruvchan bo‘ladi, kunning ikkinchi yarmida biroz yomg‘ir yog‘ishi mumkin. Sharqiy shamol yo‘nalishini o‘zgartirib, g‘arbdan 3–8 metr/soniya tezlikda esadi, 10–12 metr/soniyagacha kuchayishi, chang-to‘zonlar bilan kuzatilishi mumkin. Harorat kechasi +11…+13 daraja, kunduzi +21…+23 daraja bo‘ladi.

29–30 oktyabr kunlari havo o‘zgaruvchan bo‘ladi, yog‘ingarchilik kutilmaydi. Shamol sharqdan 3–8 metr/soniya tezlikda esadi. Harorat kechalari +11…+13 daraja, kunduz kunlari +22…+25 daraja bo‘ladi.