Wise Rossiya va Belarus fuqarolarining kartalarini YeI sanksiyalari asosida blokladi

Yangi cheklovlar Rossiyaning Ukrainaga qarshi davom etayotgan urushi munosabati bilan qabul qilingan YeIning 19-sanksiya paketi talablariga muvofiq joriy etildi, deb xabar beriladi dushanba kuni, 1 dekabrda, Wise saytida.

Bayonotda ta’kidlanishicha, kartani blokdan chiqarish uchun 30 yanvarga qadar mijoz o‘z fuqaroligini yoki YeIHga kiruvchi mamlakatlar (YeI davlatlari, Norvegiya, Islandiya, Lixtenshteyn, Shveytsariya)dan birining vaqtinchalik yoki doimiy yashash ruxsatnomasini tasdiqlatishi kerak. Kompaniya bu o‘zgarishlar haqida ular taalluqli bo‘lgan barcha mijozlarni xabardor qilgan.

Tekshiruv yakunlanguncha bu mijozlar kartalaridan xaridlar uchun foydalana olmaydi, bankomatdan naqd pul ololmaydi, kartasi rekvizitlari orqali obuna to‘lovlarini ham amalga oshira olmaydi.

Talab etiladigan fuqarolik yoki yashash uchun ruxsatnomaga ega bo‘lmagan mijozlar Wise’ning raqamli yoki plastik kartalaridan endi umuman foydalana olmaydi. Shu bilan birga ular servisning boshqa xizmatlaridan — pul yuborish, saqlash, qabul qilish va konvertatsiya qilish imkoniyatlaridan hali foydalanadi, deyiladi kompaniya bayonotida.

Yevropa Ittifoqining 19-sanksiya paketi oktyabr oyi oxirida ma’qullangan bo‘lib, unga, jumladan, “Rossiya fuqarolariga elektron pul berishga” taqiq ham kiritilgan. Xususiy tartibda xuddi shunday cheklovlar Belarus fuqarolariga nisbatan ham joriy etilgan.

Ushbu paket qabul qilinganidan so‘ng Yevropada yashovchi ayrim rossiyaliklarning hisob raqamlari Revolut internet banki tomonidan bloklangani ma’lum bo‘ldi. OAV ma’lumotlariga ko‘ra, bu chora, jumladan, gumanitar viza egalariga, shuningdek yashash uchun ruxsatnomasi muddati uzaytirilmaganlarga taalluqli bo‘lgan. Keyinchalik ularning bir qismida hisoblar qayta ochilgani xabar qilindi, biroq boshqa bank va to‘lov platformalarida, jumladan Paysera xizmatida ham shunga o‘xshash holatlar qayd etilgan.