Toshkentda avtobus haydovchisi o‘z ehtiyotsizligi oqibatida halok bo‘ldi

Toshkent shahri Sergeli tumanida avtobus haydovchisi bilan baxtsiz hodisa sodir bo‘ldi, deya xabar bermoqda «Toshshahartransxizmat» kompaniyasi.

Ma’lum bo‘lishicha, 20 dekabr kuni soat 16:56 atrofida 55-yo‘nalishda harakatlanadigan Yutong avtobusi haydovchisi I.A (1970 yilda tug‘ilgan, staji 35 yil) avtobusni Sergeli tumani Xonobod ko‘chasi bo‘ylab boshqarib kelib temiryo‘l kesishmasida poyezd o‘tayotgani sababli to‘xtatib turgan.

Shu vaqtda uning orqasida to‘xtab turgan 126-yo‘nalishdagi Yutong avtobus haydovchisi E.R (1988 yilda tug‘ilgan, staji 17 yil) avtobusni qo‘l tormoziga qo‘ymasdan pastga tushib uning oldiga o‘tgan. Shu paytda avtobus o‘z inersiyasi bilan yurib ketib, haydovchini siqib qo‘ygan.

Kompaniyaga ko‘ra, mazkur baxtsiz hodisa haydovchi E.R.ning ehtiyotsizligi oqibatida sodir bo‘lgan va u voqea joyida vafot etgan.

Hozirda ushbu hodisa IIBB Tergov bo‘limi tomonidan rasmiylashtirilgan, deyiladi xabarda.