Depozitar operatsiyalar to‘xtatilishi va qog‘ozlarni o‘tkazish mexanizmi belgilandi

Adliya vazirligi “Investitsiya vositachisi faoliyati to‘xtatib turilgan va tugatilgan taqdirda, depozitar operatsiyalar bo‘yicha harakatlar tartibi to‘g‘risida”gi nizomni davlat ro‘yxatidan o‘tkazdi. Nizom 2025 yil 18 dekabrda №3727 raqami bilan ro‘yxatdan o‘tkazilgan.

Nizomga ko‘ra, investitsiya vositachisining litsenziyasi to‘xtatib turilganda, u depozitar operatsiyalarni to‘xtatadi va bu haqda 2 ish kuni ichida ommaviy axborot vositalarida hamda fond birjasining veb-saytida e’lon qiladi.

Shuningdek, investitsiya vositachisining litsenziyasi tugatilganda yoki bekor qilinganda, u deponentlarning hisobvaraqlaridan ko‘chirmalarni shakllantirishi va faoliyati tugatilgani haqida xabarnomani deponentga yuborishi belgilangan.

Nizomda qayd etilishicha, deponent xabarnomani olganidan so‘ng 1 hafta muddatda tugatilayotgan investitsiya vositachisiga o‘z qimmatli qog‘ozlarini boshqa investitsiya vositachisiga o‘tkazish to‘g‘risida topshiriq berishi lozim.

Agar deponent tomonidan bunday topshiriq taqdim etilmasa, investitsiya vositachisi qimmatli qog‘ozlarni «Qimmatli qog‘ozlar markaziy depozitariysi» AJga o‘tkazadi.

Ma’lum qilinishicha, «Qimmatli qog‘ozlar markaziy depozitariysi» AJga vaqtincha saqlash uchun topshirilgan qimmatli qog‘ozlar 1 kun ichida deponent tanlagan investitsiya vositachisiga o‘tkazib berish orqali deponentlarga qaytariladi.