Qozog‘istonda «Osh markazi»da portlash: olti kishi halok bo‘ldi

Qozog‘istonning Aqmola viloyati, Burabay tumaniga qarashli Shchuchinsk shahridagi «Osh markazi» nomli ovqatlanish maskanida portlash va yong‘in oqibatida olti kishi halok bo‘ldi, yana taxminan 20 kishi jabrlandi. Bu haqda viloyat Favqulodda vaziyatlar departamenti Instagram’da xabar berdi.

Idora ma’lumotiga ko‘ra, o‘t o‘chiruvchilar binodan sakkizta gaz ballonini olib chiqqan va 10 nafardan ortiq kishini qutqargan. Soat 22:40 holatiga ko‘ra, yong‘in to‘liq bartaraf etilgan. Hodisaning sabablari va holatlari aniqlanmoqda.

Hodisa joyida FVV xodimlari, Aqmola viloyati hokimiyati rahbarining o‘rinbosari, tibbiy xizmatlar, politsiya hamda gaz-texnik inspeksiya vakillari ish olib bormoqda.