Ko‘k choy depressiyadan himoya qiladi - olimlar

Tayvanlik olimlar ko‘k choyni muntazam iste’mol qilish depressiyaga tushish ehtimolini kamaytirishini aniqladilar. Tadqiqot natijalari Nutriens jurnalida e’lon qilindi.

Tadqiqotda 27 119 nafar kishi ishtirok etgan. Barcha ishtirokchilar tibbiy ko‘rikdan o‘tgan va qon tahlillari topshirgan. Ko‘ngillilar o‘zlarining zararli odatlari, kasalliklari va jismoniy faolligi haqida ma’lumot bergan.

Choy iste’moli bilan depressiya o‘rtasidagi bog‘liqlik yosh, jins, salomatlik holati va turmush tarzi kabi omillar bilan taqqoslangan holda o‘rganilgan.

Olimlarning aniqlashicha, kuniga bir-ikki piyola choy depressiya xavfini sezilarli darajada kamaytiradi. Ammo kunlik me’yor oshib ketsa, choy tarkibidagi kofein va tanin moddalari uyqusizlik, bezovtalik yoki oshqozon bilan bog‘liq muammolarni keltirib chiqarishi mumkin.

Taxmin qilinishicha, choyning foydali ta’siri uning tarkibidagi polifenollar va teanin kabi moddalar bilan bog‘liq. Ular asab tizimiga ijobiy ta’sir ko‘rsatib, nervlarni zararlanishdan himoya qiladi va asabiylikni kamaytiradi.