«Quyosh g‘oyib bo‘ldi». Tehrondagi neft omborlari yonishi oqibatida osmon qora tusga kirdi (fotolar)

Isroil mudofaa armiyasi 7 mart kuni kechqurun Eron bo‘ylab navbatdagi zarbalar seriyasini amalga oshirdi – bu safar energetika infratuzilmasi obektlari nishon bo‘lgan. Isroillik harbiylar bergan xabarga ko‘ra, ushbu obektlarda ishlab chiqarilgan yoqilg‘i mahsulotlari Eron qurolli kuchlari ehtiyojlari uchun ishlatilgan. Tehronga qo‘shni bo‘lgan Alborz viloyatidagi neft omborlari bo‘ylab ham zarbalar berilgan. Eron poytaxti shimoli-g‘arbida joylashgan bazalardan biri bo‘lgan Shahran bazasi 2025 yil iyunida 12 kunlik urush chog‘ida ham Isroil zarbasiga uchragandi. Ammo bu safargi zarbalar ko‘lami kengroq bo‘ldi.

Guvohlar CNN muxbiriga aytishicha, ushbu zarbalardan keyin kuchli yong‘inlar chiqishi tufayli 8 mart kuni tongida osmon qora tusga kirgan, odamlar nafas olishga qiynalgan. Tehronda yashovchilardan biri BBC’ga bergan intervyusida «qora tutun quyoshni to‘sib qo‘ygani» haqida gapirgan.

Bundan tashqari, Tehronga «neft yomg‘iri» tushgan: neft yonishidan ajralgan moddalar yomg‘ir suviga aralashib ketgan. Quyida Eron poytaxtida kuzatilayotgan manzara aks etgan suratlar keltiriladi.