Tramp Shavkat Mirziyoyevni Tinchlik kengashi yig‘ilishiga taklif qildi

AQSh prezidenti Donald Tramp O‘zbekiston prezidenti Shavkat Mirziyoyevni Tinchlik kengashining navbatdagi yig‘ilishi va Mayamida o‘tadigan G20 sammitiga taklif etdi.

Foto: Reuters

O‘zbekiston prezidenti Shavkat Mirziyoyev nomiga Amerika Qo‘shma Shtatlari prezidenti Donald Trampdan maktub keldi, deya xabar qildi prezident matbuot xizmati.

Amerika yetakchisi o‘z maktubida O‘zbekiston rahbarining 2026 yil fevral oyida bo‘lib o‘tgan Tinchlik kengashining ilk yig‘ilishidagi ishtirokini yuksak baholadi.

Maktubda Shavkat Mirziyoyev O‘zbekistonda ulkan natijalarga erishayotgani ta’kidlanib, mamlakatga tashrif bilan kelish taklifi uchun minnatdorlik bildirilgan.

O‘z navbatida, prezident Donald Tramp davlat rahbarini Tinchlik kengashining navbatdagi yig‘ilishiga, shuningdek, Mayamida o‘tadigan G20 sammitiga taklif etdi.

«Yaratgan Sizni va O‘zbekistonning buyuk xalqini yorlaqasin», deyiladi maktubda.

Ma’lumot uchun, Tinchlik kengashining navbatdagi yig‘ilishi 2027 yil boshida o‘tkazilishi rejalashtirilgan. G20 sammiti esa 2026 yil dekabrida bo‘lib o‘tishi kutilmoqda.