Noutbukdan akkumulyatorsiz foydalansa bo‘ladimi?

Ko‘pgina noutbuklar bevosita adapterdan quvvat olib, akkumulyatorsiz ishlay oladi va aslida statsionar shaxsiy kompyuterga aylanadi. Ammo bunday rejim doimiy ssenariy sifatida emas, balki vaqtinchalik yechim sifatida mos keladi, deb yozdi BGR.

Buning sababini tushunish uchun noutbuk va statsionar kompyuter o‘rtasidagi farqni eslash kerak. Noutbukning ichida ham xuddi shu komponentlar - protsessor, grafika va xotira mavjud - faqat ular bitta korpusda ixcham joylashtirilgan. Asosiy farq shundaki, noutbukda akkumulyator mavjud bo‘lib, u nafaqat energiya manbai, balki o‘ziga xos bufer vazifasini ham bajaradi.

Zamonaviy modellarda batareya to‘liq zaryadlanganda quvvat bevosita tarmoqdan kelib, akkumulyatorni chetlab o‘tishi mumkin, shuning uchun noutbuk batareyasiz ham ishlaydi.

Aksariyat hollarda, agar noutbuk rozetkaga ulangan bo‘lsa, batareyaning yo‘qligi unumdorlikka ta’sir qilmaydi. Bu, ayniqsa, yechib olinadigan batareyali eski modellarga taalluqlidir. Biroq istisnolar ham mavjud. Masalan, batareyasi olingan Apple noutbukining unumdorligi sezilarli darajada pasayishi mumkin. Chunki akkumulyator haroratni nazorat qilish vazifasini ham bajaradi. Usiz tizim o‘ta qizib ketishning oldini olish uchun protsessor chastotasini majburiy ravishda pasaytirishi mumkin.

Batareyasiz noutbukdan foydalanishning qanday kamchiliklari bor?

Akkumulyatorsiz ishlashning asosiy xavfi - quvvat uzilishlaridan himoyaning yo‘qligidir. Agar kuchlanish sakrashi yoki elektr ta’minotida uzilishi yuz bersa, noutbuk darhol o‘chadi. Bu ma’lumotlarning yo‘qolishiga va fayllarning shikastlanishiga olib kelishi mumkin. Bu ma’noda batareya uzluksiz ta’minot manbai kabi vazifani bajaradi.

Agar siz batareyasiz noutbukdan foydalansangiz, asosiy ehtiyot choralarini ko‘rish muhim. Faqat original quvvat adapterini ulash va kamquvvatli quvvatlash qurilmalaridan qochish kerak - bu noutbukka zarar yetkazishi mumkin. Ba’zi foydalanuvchilar batareyaning eskirishini sekinlashtirish uchun uni doimiy ishlayotganda ataylab tarmoqdan uzib qo‘yadilar. Bunday holda batareya odatda taxminan 40-50 foiz zaryadlangan holda saqlanadi.

Barcha nozik jihatlarga qaramay, akkumulyatorni almashtirish yanada oqilona yechim hisoblanadi. Usiz noutbuk tezkorligi yo‘qotadi va elektr tarmog‘iga to‘liq bog‘liq bo‘lib qoladi. Bundan tashqari, hatto 10 daqiqa ishlay oladigan kuchsiz batareya ham chiroq o‘chganda ma’lumotlarni saqlab qolishi mumkin - bu vaqt fayllarni saqlash va ishni yakunlash uchun yetarli.

Ba’zi eski modellarda, masalan, HP ProBook liniyasida, batareya korpus konstruksiyasining bir qismidir. Uni yechib olgandan so‘ng bo‘sh joy qoladi, shu sababli noutbukdan «tizzada» foydalanish noqulay bo‘ladi.

Xulosa shuki, noutbukni akkumulyatorsiz ishlatish mumkin, ayniqsa u nosoz bo‘lsa. Lekin bu vaqtinchalik chora. Uzoq muddatli istiqbolda batareyani almashtirish xavfsizroq va qulayroqdir. Agar akkumulyator shishib ketgan bo‘lsa, uni darhol chiqarib olish kerak.