Lukashenko armiyani urushga tayyorlash uchun qo‘shinlarning «maqsadli safarbarligi»ni e’lon qildi

«Keyin, va’da berganimdek, biz qismlarni urushga tayyorlash uchun maqsadli safarbar qilamiz. Urush bo‘lmasligini Xudodan iltijo qilamiz», dedi Lukashenko mudofaa vaziri Viktor Xrenin bilan uchrashuv chog‘ida.

Armiyaning tayyorgarligi haqidagi ma’ruza chog‘ida Lukashenko kamchiliklarni bartaraf etishni talab qildi.

«Men ushbu jarayon tugamasligiga, armiya rahbariyati va birinchi navbatda vazir ushbu tekshiruvdan keyin aniqlangan kamchiliklarga jiddiy e’tibor qaratishiga umid qilaman», dedi davlat rahbari.

Mart oyi oxirida mudofaa vaziri Viktor Xrenin Belarus kuchayib borayotgan tashqi tahdidlar fonida tekshiruvlar ko‘lamini oshirayotganini ma’lum qilgan edi. Uning so‘zlariga ko‘ra, 11 mart kuni boshlangan jangovar va safarbarlik tayyorgarligini kompleks tekshirish armiya tarixidagi eng keng ko‘lamli tekshiruvlardan biri bo‘ldi.

Uning doirasida 5 mingga yaqin harbiy xizmatga majburlar zaxiradan chaqirildi. Aprel oyida Lukashenko ushbu tekshiruv yakunlari bo‘yicha yig‘ilishda shunday dedi:

«Biz urushga tayyorgarlik ko‘ryapmiz... Biz urushni xohlamaymiz, ammo armiya aynan shunga mo‘ljallangan. Mabodo kimdir biz bilan gaplashishga va bizga qurol nishoni orqali qarashga qaror qilsa, biz javob beramiz. Biz shunga tayyorgarlik ko‘ryapmiz».

U, shuningdek, agar urush bo‘lsa, Belarus qo‘shinlar sonini yarim milliongacha oshirishi mumkinligini aytdi.

O‘tgan yilning mart oyida Lukashenko «Davlat organlari va boshqa tashkilotlarni urush sharoitida ishlashga o‘tkazish to‘g‘risida»gi farmonni imzolagan edi. Farmon urush davrida davlat organlari ishini muvofiqlashtiradi va zarurat tug‘ilganda rahbarlariga harbiy unvonlar berilishi mumkin bo‘lgan bir qator tashkilotlarni belgilaydi.

«Farmonning chiqarilishi harbiy tahdid kuchaygan davrda va urush davrida davlat apparatining tizimli va uzluksiz ishlashini ta’minlash imkonini beradi», degan edi Lukashenko matbuot xizmati.