O‘zbekiston Eron xalqiga navbatdagi insonparvarlik yordamini yubordi

Insonparvarlik yordami Turkmaniston–Eron chegarasidagi “Artik–Lyutfobod” nazorat-o‘tkazish punktida Eron tomoniga tantanali ravishda topshirildi. Bu haqda O‘zbekiston Tashqi ishlar vazirligi xabar bermoqda.

Tadbirda O‘zbekistonning Turkmanistondagi elchisi Ravshan Alimov, Eronning Turkmanistondagi elchisi Ali Mujtabo Ro‘zbehoniy, Darg‘az shahri hokimi Mujtabo Bazmara va boshqalar ishtirok etdi.

Eron tomoni ushbu sinovli damlarda ko‘rsatilayotgan amaliy ko‘mak uchun O‘zbekiston prezidenti va xalqiga samimiy minnatdorlik bildirdi.

Ta’kidlanganidek, mazkur insonparvarlik tashabbusi O‘zbekiston va Eron o‘rtasidagi an’anaviy do‘stlik, o‘zaro hurmat, hamjihatlik va qo‘llab-quvvatlash ruhining yana bir yorqin ifodasidir.

Eslatib o‘tamiz, O‘zbekiston tomoni urush domiga tushib qolgan Eron xalqiga insonparvarlik yordamining dastlabki partiyasini shu yil mart oyi o‘rtalarida yo‘llagan edi.