AQSh Eronda raketa maydonchalariga hujum qildi

AQSh Markaziy qo‘mondonligi - CENTCOM Eron janubidagi bir qator harbiy obektlarga zarba berilganini ma’lum qildi. Unga ko‘ra, hujumlar “o‘zini himoya qilish maqsadida” amalga oshirilgan.

Foto: U.S. Navy/Planet Pix/ZUMA/picture alliance

CENTCOM bayonotida aytilishicha, zarbalar raketa uchirish maydonchalari hamda mina joylashtirishga uringan kemalarga qaratilgan.

Qo‘mondonlik rasmiy vakili Tim Xokinsning so‘zlariga ko‘ra, mazkur harakatlar amerikalik harbiylarni Eron kuchlaridan kelayotgan tahdidlardan himoya qilish maqsadida o‘tkazilgan.

Shu bilan birga, u AQSh amaldagi sulh rejimini saqlashda “o‘zini tiyib turish” siyosatini davom ettirayotganini ta’kidladi.

Ma’lumotlarga ko‘ra, AQSh va Eron o‘rtasida 8 apreldan buyon o‘t ochishni to‘xtatish rejimi amal qilmoqda. AQSh prezidenti Donald Tramp esa 25 may kuni Truth Social tarmog‘ida Eron bilan tinchlik muzokaralari “juda yaxshi” ketayotganini bildirgan.

Trampning ta’kidlashicha, tomonlar o‘rtasida yo katta kelishuvga erishiladi, yoki muzokaralar muvaffaqiyatsiz yakunlansa, urush yanada kuchli ko‘rinishda qayta boshlanishi mumkin.