Tramp Eron urani bo‘yicha yangi bayonot berdi

U o‘zining Truth Social ijtimoiy tarmog‘ida qoldirgan bayonotida Eron uranini mamlakat hududidan tashqariga olib chiqmasdan turib yo‘q qilish eng maqbul variant ekanini ta’kidladi. Tramp shu bilan birga boyitilgan uranni “yadroviy chang” deb atagan.

AQSh va Isroil Eronning yadroviy dasturini mamlakatga qarshi harbiy harakatlarning asosiy sabablaridan biri sifatida ko‘rsatmoqda. Vashington ma’lumotlariga ko‘ra, Tehron hozirda 60 foizgacha boyitilgan 440 kilogrammdan ortiq uran zaxirasiga ega.

Mutaxassislar fikricha, ushbu uran qisqa muddat ichida 90 foizgacha boyitilishi mumkin va bu uni yadroviy qurol ishlab chiqarish uchun yaroqli holatga keltiradi.

Eron rasmiylari esa mamlakat yadroviy dasturi faqat tinch maqsadlarga qaratilganini ta’kidlab kelmoqda. Shu bilan birga, yangi hujumlar sodir bo‘lgan taqdirda uranni yanada yuqori darajada boyitish mumkinligini bildirgan.

Hozircha Tehron AQSh yoki boshqa davlatga boyitilgan uran zaxiralarini topshirish bo‘yicha hech qanday kelishuvni rasman tasdiqlamagan.