Ehtiyot choralarini bekor qilish vakolati faqat sudga o‘tkazilishi mumkin

Qonun loyihasiga ko‘ra, ishni sudga qadar yuritish bosqichida qamoqqa olish, uy qamog‘i va boshqa ehtiyot choralarini bekor qilish yoki o‘zgartirish haqidagi qarorlar endi faqat tergov sudyasi tomonidan qabul qilinishi mumkin.

Hujjatda prokuror, surishtiruvchi va tergovchining mazkur vakolatlarini cheklash, shuningdek “xabeas korpus” institutini yanada kengaytirish nazarda tutilgan.

Loyiha bilan Jinoyat-protsessual kodeksiga hamda bir qator qonun hujjatlariga o‘zgartish va qo‘shimchalar kiritish taklif etilgan.

Shuningdek, umrbod ozodlikdan mahrum qilish jazosi nazarda tutilgan o‘ta og‘ir jinoyat ishlarini xalq vakillari ishtirokida ko‘rib chiqish tartibini joriy etish rejalashtirilmoqda.

Hujjat mualliflariga ko‘ra, ushbu o‘zgarishlar sudlarda adolat, shaffoflik va xolislikni kuchaytirish, fuqarolarning huquqni muhofaza qiluvchi organlarga bo‘lgan ishonchini oshirishga xizmat qiladi.