Qizilqum cho‘lida anomal yomg‘irlardan so‘ng juda katta ko‘l paydo bo‘ldi

Buxoro viloyati, Peshku tumanining Gazli qishlog‘idan shimolda, so‘nggi 6 oy ichida me’yordan uch baravar ko‘p yog‘ingarchilik oqibatida katta suv havzasi paydo bo‘ldi. Bu haqda Ekologik partiya xabar berdi.

Yangi ko‘l ilgari suvsiz deb hisoblangan Sho‘rbuloq hududida paydo bo‘ldi va bugungi kunda uning maydoni taxminan 80 kvadrat kilometrni tashkil etadi.

Suv havzasi o‘z ko‘lami bo‘yicha Buxoro shahrining maydonidan ancha katta bo‘lib, mamlakatning yirik gidrologik obektlari, jumladan, Chorvoq suv ombori bilan taqqoslanmoqda. Mutaxassislarning ta’kidlashicha, ko‘lning shakllanishi nafaqat tabiiy omillar, balki inson faoliyati bilan ham bog‘liq.

Xususan, Suv xo‘jaligi vazirligining baliqchilikni rivojlantirish dasturlari doirasida hududda kichik kanallar qazilib, ular orqali yangi suv havzasiga atrofdagi sizot suvlari yo‘naltirilmoqda. Ko‘lni to‘ldirib turuvchi kollektor kanalining umumiy uzunligi 126 kilometrga yaqin. Qo‘shimcha suv oqimi kuchli yog‘ingarchilikka qo‘shilib, suv massalarining tez to‘planishiga olib kelgan.