Saida Mirziyoyeva Qozog‘iston prezidenti administratsiyasi rahbari bilan uchrashdi

Saida Mirziyoyeva Qozog‘iston Respublikasi prezidenti administratsiyasi rahbari Roman Sklyar bilan uchrashib, O‘zbekiston va Qozog‘iston o‘rtasidagi sheriklik munosabatlarining bugungi holati hamda ularni yanada rivojlantirish istiqbollarini muhokama qildi.

Foto: Saida Mirziyoyeva / Telegram

Uchrashuv chog‘ida tomonlar ikki mamlakat rahbarlari darajasida erishilgan kelishuvlarning izchil va to‘liq amalga oshirilishi masalalari yuzasidan fikr almashdi.

Suhbat davomida prezident administratsiyalari o‘rtasida yanada yaqin, tezkor va samarali hamkorlik mexanizmlarini yo‘lga qo‘yish muhimligi ta’kidlandi. Shu maqsadda ikki davlat administratsiyalari o‘rtasidagi o‘zaro aloqalarni mustahkamlash va muvofiqlashtiruvchi hamkorlikni kengaytirishga kelishib olindi.

Tomonlar O‘zbekiston–Qozog‘iston strategik sherikligi va ittifoqchilik munosabatlarini yanada rivojlantirishga xizmat qiluvchi qo‘shma tashabbuslarni qo‘llab-quvvatlashga tayyor ekanliklarini bildirdi.