Qo‘shilgan qiymat solig‘i bo‘yicha hisobotga tuzatish kiritildi

Moliya vazirligi va DSQning qarori bilan soliq hisobotining shakllariga o‘zgartirish va qo‘shimchalar kiritildi, deb yozmoqda Norma.
 
Qo‘shilgan qiymat solig‘i hisob-kitobi va unga ilovalardan aholiga realizatsiya qilinadigan tabiiy gaz bo‘yicha QQSni umumiy summalardan ajratuvchi ko‘rsatkichlar aks ettirilgan satrlar chiqarib tashlandi. Bu bilan hisobot Soliq kodeksiga muvofiqlashtirildi – 2015 yil 1 yanvardan aholiga realizatsiya qilinadigan gaz bo‘yicha QQSning nol darajali stavkasi bekor qilingan (4.12.2014 yildagi O‘RQ–379-son Qonunning 4-moddasi 21-bandi). Gaz narxi davlat tomonidan tartibga solinadi va QQSni o‘z ichiga oladi.
 
QQS hisob-kitobiga 6-ilova «Nol darajali stavka bo‘yicha qo‘shilgan qiymat solig‘i solinadigan tovarlar (ishlar, xizmatlar) realizatsiyasi hisob-kitobi»ning 060-satri Soliq kodeksining 217-moddasiga muvofiq bayon etildi. Aholiga ko‘rsatiladigan va nol darajali stavka bo‘yicha QQS solinadigan kommunal xizmatlar ro‘yxatiga idoraviy uy-joy fondi uylarida yashayotgan aholi uchun Mudofaa vazirligining bo‘linmalari tomonidan olinadigan xizmatlar qo‘shimcha qilindi.
 
Hujjat 20.08.2018 yildan kuchga kirdi.