Turkiyada sodir bo‘lgan zilziladan jabr ko‘rgan qardosh millat vakillariga O‘zbekistonning ko‘plab hududlarida yordam yuklari yig‘ildi. Xususan, Qashqadaryo viloyatida ham turk xalqiga insonparvarlik yordami to‘planmoqda.
Ushbu tashabbusga O‘zbekiston Savdo-sanoat palatasi va “Yoshlar – kelajagimiz” jamg‘armasi bosh bo‘lmoqda. Shuningdek, O‘zbekistondagi ikki davlat ishbilarmonlari UTID, DEIK, MUSIAD nomidan insonparvarlik yordami yuborish rejalashtirilgan.
Qarshidagi yordam markazida asosan qishki kiyimlar, quruq oziq-ovqat mahsulotlari hamda konservalar, chodir, yotoq buyumlari, yopinchiqlar, generator, chiroq va isitgich pechlari kabi zaruriy jihozlar voha ahli tomonidan taqdim etilmoqda.
Humanitar yordam har kuni, soat 09:00 dan 20:00 ga qadar Qarshi shahridagi Savdo-sanoat palatasi binosida (eski mebelllar uyi) qabul qilinyapti. Yig‘ilgan mahsulotlar 11 fevral kuni Toshkent shahriga, u yerdan esa Turkiyaga jo‘natilishi ko‘zda tutilgan.