Erdo‘g‘an O‘zbekiston tashqi ishlar vaziri va kuch tuzilmalari rahbarlarini qabul qildi

20 yanvar kuni Anqarada O‘zbekiston tashqi ishlar vaziri Baxtiyor Saidov boshchiligidagi delegatsiya Turkiya prezidenti Rajab Toyyib Erdo‘g‘an bilan uchrashdi. Delegatsiya tarkibida O‘zbekiston mudofaa vaziri Shuhrat Xolmuhamedov, ichki ishlar vaziri Aziz Toshpo‘latov va Davlat xavfsizlik xizmati raisi Bahodir Qurbonov ham ishtirok etgan. Shuningdek, uchrashuvda Turkiya rasmiylari ham qatnashgan.

Baxtiyor Saidov Erdo‘g‘anga Shavkat Mirziyoyevning salomini yetkazgan.

«Mamlakatlarimiz o‘rtasidagi ikki tomonlama munosabatlar ijobiy rivojlanish sur’atini ko‘rsatayotgani, o‘zaro manfaatli hamkorlikni mustahkamlash uchun eng qulay sharoitlarni yaratayotganini ta’kidladik», deyiladi Saidovning postida.

Shuningdek, Anqara O‘zbekiston tashqi ishlar vaziri Baxtiyor Saidov va Turkiya tashqi ishlar vaziri Hoqon Fidan raisligida Qo‘shma strategik rejalashtirish guruhining to‘rtinchi yig‘ilishi ham o‘tkazildi.

Ushbu yig‘ilish doirasida savdo va investitsiyalar, energetik xavfsizlik, mintaqaviy bog‘liqlik, terrorizm va transmilliy tahdidlarga qarshi kurash, mehnat migratsiyasi, madaniyat, ta’lim va turizm kabi ustuvor yo‘nalishlar muhokama qilingan.

«Ushbu yig‘ilish O‘zbekiston va Turkiya prezidentlari hamraisligida o‘tkazilishi rejalashtirilayotgan Oliy darajadagi strategik hamkorlik kengashining navbatdagi yig‘ilishiga muhim tayyorgarlik bosqichi bo‘ldi», deyiladi O‘zbekiston TIV bayonotida.

Uchrashuvda, shuningdek vazirlar «imkon qadar turli xalqaro lavozimlarga nomzodlar borasida o‘zaro qo‘llab-quvvatlash amaliyotini davom ettirish» bo‘yicha kelishuvga erishgan. Afg‘oniston, G‘azo, Ukraina va Suriya kabi mintaqaviy va xalqaro masalalar bo‘yicha fikr almashildi.

Shuningdek, O‘zbekiston va Turkiya tashqi ishlar vazirliklari o‘rtasida 2026–2027 yillarga mo‘ljallangan Harakatlar rejasi imzolandi.

Kunning eng muhim uchrashuvlaridan biri O‘zbekiston va Turkiya tashqi ishlar, ichki ishlar va mudofaa vazirlari hamda xavfsizlik xizmatlari rahbarlari ishtirokida «4+4» mexanizmi doirasidagi yig‘ilish bo‘ldi.

Unda O‘zbekiston tomonidan tashqi ishlar vaziri Baxtiyor Saidov, mudofaa vaziri Shuhrat Xolmuhamedov, ichki ishlar vaziri Aziz Toshpo‘latov va Davlat xavfsizlik xizmati raisi Bahodir Qurbonov qatnashdi.

Turkiya tomonidan esa tashqi ishlar vaziri Hoqon Fidan, ichki ishlar vaziri Ali Yerlikaya, milliy mudofaa vaziri Yashar Guler va Milliy razvedka tashkiloti direktori Ibrahim Kalinlar qatnashdi.

O‘zbekiston TIVga ko‘ra, uchrashuvda ikki tomonlama munosabatlarning eng dolzarb mavzulari, mintaqaviy masalalar va global jarayonlar umumiy kun tartibiga kiritilgan.

«Bugun dunyoda misli ko‘rilmagan burilishlar va jadal o‘zgarishlar kuzatilmoqda. Rivojlanayotgan mamlakatlar tobora ko‘proq sinovlarga duch kelmoqda. Zamonaviy global voqeliklarni inobatga olgan holda, barqaror rivojlanish va farovonlikni mustahkam xavfsizlik asosida ta’minlashga qaratilgan eng samarali hamkorlik yo‘llarini muhokama qildik», deyiladi xabarda.

Shuningdek, «sa’y-harakatlarni samarali muvofiqlashtirish maqsadida yaqin istiqbolga mo‘ljallangan Qo‘shma harakatlar rejasi» qabul qilingan.

Bundan tashqari, Turkiya milliy mudofaa vaziri Yashar Guler hamda O‘zbekiston mudofaa vaziri, general-leytenant Shuhrat Xolmuhamedov alohida uchrashuv o‘tkazdi.

Turkiya tomoniga ko‘ra, uchrashuv yakunida har ikki vazir tomonidan quyidagi hujjatlar imzolandi:

• «Turkiya Respublikasi Hukumati bilan O‘zbekiston Respublikasi Hukumati o‘rtasida harbiy tibbiyot sohasida ta’lim va hamkorlik to‘g‘risidagi bitim»;
• «Turkiya Respublikasi Milliy mudofaa vazirligi bilan O‘zbekiston Respublikasi Mudofaa vazirligi o‘rtasida 2026 yil uchun harbiy hamkorlikni amalga oshirish rejasi».

General-leytenant Shuxrat Xolmuxamedov Turkiyaning mudofaa sanoati va harbiy tayyorgarlik tajribasi O‘zbekiston armiyasini modernizatsiya qilish, harbiy salohiyatni har jihatdan yanada mustahkamlashda muhim rol o‘ynashini qayd etgan.

Ma’lum qilinishicha, 2026 yilgi harbiy hamkorlikni amalga oshirish rejasida mamlakatlar harbiy bo‘linmalarining qo‘shma mashqlari, kadrlar malaka almashinuvi va texnik hamkorlik bosqichlari o‘rin olgan.

Bundan tashqari, O‘zbekiston ichki ishlar vaziri general-leytenant Aziz Toshpo‘latov hamda Turkiya ichki ishlar vaziri Ali Yerlikaya o‘rtasida ikki tomonlama uchrashuv tashkil etildi.

Tadbirda tomonlar hamkorlikning ustuvor yo‘nalishlaridan biri sifatida kiberjinoyatchilikka qarshi kurash masalalarini muhokama qilgan.

«Tomonlar raqamli xavf-xatarlarga qarshi samarali choralar ko‘rish, kiberjinoyatlarni fosh etishda ilg‘or texnologiyalardan foydalanish, raqamli kriminalistika yo‘nalishida maxsus o‘quv kurslarini tashkil etish hamda bu sohada muntazam tajriba almashib borish muhim ekanini ta’kidladi», deyiladi IIV xabarida.

Shu bilan birga, terrorizm va ekstremizm, noqonuniy migratsiya, odam savdosi, giyohvand moddalarning noqonuniy aylanmasi kabi xalqaro miqyosdagi jinoyatlarga qarshi kurashish bo‘yicha hamkorlikni yanada kuchaytirish masalalari ham muhokama markazida bo‘ldi.

Uchrashuv yakunida migratsiya jarayonlarini tartibga solish, fuqarolarning o‘z davlatlariga qaytishiga ko‘maklashish hamda bu borada o‘zaro muvofiqlashgan chora-tadbirlarni amalga oshirish to‘g‘risida Anglashuv memorandumi imzolandi.