Xodimlar bilan to‘qnash kelgan namoyishchilarni orqaga qaytarish uchun politsiya ko‘zdan yosh oqizuvchi gaz va suv purkagichlardan foydalangan. Namoyishlar Fransiyaning boshqa shaharlarida ham bo‘lib o‘tdi.
Parijda 6000 ga yaqin odam hukumat tashabbusi bilan boshlangan pensiya islohotiga qarshi norozilik namoyishiga chiqdi. Shahar markazida politsiya bilan to‘qnashuvlar sodir bo‘ldi, natijada 16 mart, payshanba kuni kamida 217 kishi qo‘lga olindi, deya xabar bermoqda dpa Fransiya politsiyasiga tayanib.
Namoyishchilarni orqaga qaytarish uchun ko‘zdan yosh oqizuvchi gaz va suv purkagichlar ham qo‘llangan, odamlar politsiyaga qarata turli buyumlar va yog‘och bo‘laklarini otishgan. Namoyishlar mamlakatning boshqa bir qancha shaharlarida, jumladan Marsel, Dijon, Nant, Renn, Ruan, Grenobl, Tuluza va Nitssada ham bo‘lib o‘tdi. AFP xabariga ko‘ra, Marselda namoyishchilar bir nechta do‘konlarni buzib tashlagan, Nant, Renn va Lionda ham namoyishchilar va huquq-tartibot kuchlari o‘rtasida to‘qnashuvlar bo‘lgan.
Avvalroq Fransiyada pensiya islohoti parlamentni chetlab o‘tib qabul qilingani ma’lum bo‘ldi – yangi qonunni Milliy Assambleyada ovoz berishsiz qabul qilish uchun Fransiya hukumati konstitutsiyaning maxsus moddasidan foydalangan. Qonun loyihasi Fransiya prezidenti Emmanuel Makronning saylovoldi kampaniyasidagi asosiy va’dalaridan birini – pensiya yoshini 62 yoshdan 64 yoshgacha ko‘tarishni amalga oshirishi kerak. Bu 2030 yilgacha bosqichma-bosqich amalga oshiriladi.
Mamlakat bo‘ylab ommaviy norozilik namoyishlari bo‘lib o‘tgani hisobga olinsa, Fransiya Senati tomonidan qo‘llab-quvvatlangan qonun loyihasi Milliy Assambleya deputatlari tomonidan rad etilishi ehtimoli yuqori edi.
Boshqa narsalar qatorida, pensiya islohoti pensiya to‘lovlarini to‘liq olish uchun badallar to‘lanishi kerak bo‘lgan eng kam davrni 43 yilga oshirishni nazarda tutadi. Fransiyadagi ko‘plab keksa odamlar hozirda 62 yoshdan oshgan bo‘lsa-da, kerakli miqdordagi mablag‘ni to‘ldirish uchun ishlamoqda. Biroq, 67 yoshga to‘lgan fuqarolar, ushbu ajratmalar qaysi davrda amalga oshirilganligidan qat’i nazar, to‘liq miqdorda pensiya olish huquqiga ega. Bu pozitsiya saqlanib qolishi kerak. Shu bilan birga, Makron hukumati eng kam pensiya miqdorini oyiga 1200 yevrogacha oshirish niyatida.
Kasaba uyushmalari pensiya islohotini adolatsiz va asossiz darajada qattiq deb hisoblayapti hamda ushbu mavzu bo‘yicha referendum o‘tkazishga chaqiryapti. So‘rovlarga ko‘ra, fransuzlarning uchdan ikki qismi hukumat taklif qilayotgan o‘zgarishlarga qarshi.
