O‘zbekiston Orolbo‘yi mintaqasida inson xavfsizligi bo‘yicha BMTning ko‘p tomonlama hamkorlik trast fondi doirasida «yashil» investitsiyalarni rag‘batlantirish maqsadida Microsoft kompaniyasi asoschisi Bill Geyts va uning rafiqasi Melindaning xayriya tashkiloti mablag‘larini jalb qilish niyatida. Bu haqda Kun.uz muxbiri xabar berdi.
O‘zbekiston prezidenti Shavkat Mirziyoyev joriy yilning birinchi yarmida BMT bilan birgalikda trast fondi ishi uchun moliyaviy resurslarni jalb qilish bo‘yicha strategiya ishlab chiqishni nazarda tutadigan qarorni imzoladi, endi uning 2019 yilga mo‘ljallangan investitsiya portfeli tasdiqlanadi.
Mablag‘larni jalb qilish strategiyasi xususiy sektorning bo‘lishini ham nazarda tutishi kerak. Shu maqsadda Mirziyoyev xayriya fondlariga ega transmilliy kompaniyalar («Koka-Kola» Fondi, «O‘zkorgaz» kompaniyalari va boshqalar) hamda Bill va Melinda Geyts Fondi (Bill & Melinda Gates Foundation) kabi xususiy tashkilotlar ro‘yxatini shakllantirish haqida ko‘rsatma berdi. Bill Geyts jamg‘armasi 50 milliard dollar miqdordagi aktivlari bilan AQShdagi eng yirik xususiy fond hisoblanadi.
BMTning ko‘p tomonlama sheriklik trast fondi 2018 yil 27 noyabrda BMTning Nyu-Yorkdagi qarorgohida rasmiy ravishda ishga tushirildi. U Orolbo‘yi mintaqasida ekologik falokat oqibatlarini bartaraf etishga qaratilgan loyihalar uchun moliyaviy va texnik vositalarni safarbar qilishi kerak. Fond 2023 yil oxirigacha ishlaydi.
Jamg‘armaning birinchi donori O‘zbekiston hukumati bo‘ldi, u 6,5 million dollar sarmoya kiritdi. Norvegiya, Yaponiya va boshqa bir qator mamlakatlar ham loyihalarni moliyalashtirishni xohlamoqda.
