09:42 / 24.01.2021
12198

Dunyoda ikki qo‘l va yelkaning ko‘chirib o‘tkazilishi bo‘yicha ilk amaliyot amalga oshirildi

Fransiyada dunyoda ikki qo‘l va yelkaning ko‘chirib o‘tkazilishi bo‘yicha ilk jarrohlik amaliyoti o‘tkazildi. Tana a'zolari 48 yoshli islandiyalik Feliks Gretarssonga ko‘chirib o‘tkazilgan.

Foto: Unsplash

The Guardian nashrining yozishicha, Gretarsson qo‘llarini 1998 yilda ishlab chiqarishdagi baxsiz hodisa tufayli yo‘qotgan. Erkak yuqori kuchlanishli elektr uzatish liniyasida ishlayotgan vaqtda kuchlanish 11 ming voltgacha ko‘tarilib ketishi oqibatida ikki qo‘lini kuydirib olgan.

Shundan keyin erkak ko‘plab jarohatlar bilan 3 oy komada yotgan. Shifokorlar uning qo‘lini kesib tashlashlariga hamda yana bir nechta operatsiya o‘tkazishlariga to‘g‘ri kelgan.

Gretarsson uchun donorlar uzoq yillar davomida izlangan. Operatsiyaga tayyorgarlik ko‘rishga 50 tibbiy xodim jalb qilingan. Operatsiya vaqtida tana a'zolarini donordan retsipiyentga ko‘chirib o‘tkazish vaqtini minimallashtirish uchun 4ta jarrohlik brigadasi ish olib borgan.  

Hozirda erkak Liondagi shifoxonalardan birida tiklanmoqda. Shifokorlar Gretarssonning yangi qo‘llari qanchalik harakatchan bo‘lishi bo‘yicha bir narsa deyishga shoshilmayaptilar. Jarrohlardan biri Aram Gazaryanning ta'kidlashicha, agar bemor tirsagini buka olsa, bu uning hayotini o‘zgartirib yuboradi.

Top