14:07 / 11.05.2021
17784
«Jurnalistlarimizni qo‘llash o‘rniga qo‘rqitib qo‘ysak, ularning o‘rnini tashqaridagilar egallashi aniq» - Komil Allamjonov

Milliy mass-mediani qo‘llab-quvvatlash va rivojlantirish jamoat fondi vasiylik kengashi raisi Komil Allamjonov Telegram’dagi sahifasida keyingi paytda jurnalistlar bilan bog‘liq muammolar tez-tez ko‘zga tashlanib turgani haqida post qoldirdi.

«Otabek Sattoriy bilan bog‘liq shov-shuvli ochiq sud jarayoni yakunlandi. Surxondaryolik blogerga olti yarim yil berildi.

Men sud hukmi haqida fikr bildira olmayman, bunday vakolatim yo‘q. Va Otabekning qanchalik aybdorligi haqida ham ma'lumotga ega emasman. Hozir aytmoqchi bo‘lganlarim, umuman, matbuotimiz hayotiga taalluqli.

Keyingi paytda jurnalistlar bilan bog‘liq muammolar tez-tez ko‘zga tashlanib turibdi. Matbuotchilar qanday qiyinchiliklarga duch kelayotganini ham bilyapmiz.

Ammo men bir gapni ishonch bilan ayta olaman: o‘zimizning jurnalistlarni qo‘llash, himoya qilish o‘rniga og‘zini ocholmaydigan darajada qo‘rqitib qo‘ysak, ularning o‘rnini boshqalar – tashqaridan turib fitna chiqaradiganlar egallashi aniq! Undaylarning niyati ma'lum – jamoatchilik fikrini allakimlar uchun manfaatli tomonga burish, sodda odamlarimizning his-tuyg‘ularini qo‘zg‘atib, shu orqali ommani boshqarish. Bu yo‘lda na haqiqatga o‘rin bor, na vijdonga!» deydi Komil Allamjonov.

Uning yozishicha, cho‘chib qolgan bloger yoki jurnalist anonimga aylanib ketishi mumkin.

«Qolaversa, cho‘chib qolgan bloger yoki jurnalist anonimga aylanib ketishi mumkin. Jurnalist yoki blogerlik ko‘pincha odamning qon-qonida bo‘ladi. Atrofdagi hayotga befarq bo‘lmagan bu haqiqiy vatanparvarlar har qanday holatda baribir yozaveradi. Texnika asrida informatsiya oqimini to‘sishning yagona yo‘li internetni davlat miqyosida butunlay o‘chirib qo‘yishdir. Albatta, tanlovni hamma o‘zi qiladi. Bizning chaqiruvimiz – sog‘lom va qonuniy munosabatlarni yo‘lga qo‘yish. Qonun hamma uchun: bloger, jurnalist uchun ham, hokim, vazir uchun ham birdek ishlashi kerak. Shundagina hukmlarning adolatli ekanligiga shubha kamayadi.

Vatan – bizniki! Va hech kim shu zaminda yashab faoliyat yuritayotgan o‘zimizning jurnalist va blogerlarchalik Vatanimiz, millatimiz taraqqiyoti uchun qayg‘urmaydi.

Hurmatli hamkasblar! Albatta, tanlagan sohamiz juda qaltis, lekin yurt taraqqiyotida bu juda muhim yo‘nalish. Buni davlat rahbari ham bir necha bor ta'kidlaganlari bejiz emas. Shashtingizni tushirmang. Biz oson bo‘lmagan yo‘ldamiz. Shu paytgacha hammaning ovozini baravar o‘chirish hech kimning qo‘lidan kelmagan. Bundan keyin ham shunday bo‘ladi. Alloh barchamizni asrasin», deyiladi postda.

Ma'lumot uchun, 10 may kuni jinoyat ishlari bo‘yicha Muzrabot tuman sudida bloger Otabek Sattoriy ustidan sud jarayoni nihoyasiga yetdi va sud hukmi e'lon qilindi. U tuhmat va tovlamachilik moddalari bilan aybdor deb topilib, 6,5 yilga ozodlikdan mahrum qilindi. Jazo umumiy tartibli koloniyalarda o‘taladi.

Top